UmuvugabutumwaMapendo ati : " Naho bakoze  amakosa si abo guheba''.

Umuvugabutumwa w'umurundikazi aba mu gihugu c'Ububirigi  Mapendo Anne Marie avuga ko naho abanyororo bakoze amakosa si abo guheba kuko ngo n'abatari mu mabohero  barakora  amakosa ushobora gusanga aruta n'ayo abari mu mabohero.

Mu ntumbero yo kugarukira ku bari mu ngorane zitandukanye , umuvugabutumwa Mapendo Anne Marie yarasavye uruhusha abarongoye ibohero rikuru rya Mpimba. Muri abo harimwo abanyororo bari bakeneye ivyambarwa, abavyeyi bari bakeneye ibikoresho nkenerwa ku mukenyezi, abana bari bakeneye imisururu hamwe n'abantu bari bafise impapuro zo kwa muganga ziriko imiti yo gurwa mugabo batashobora kuyigurira . Amaze kuronka urwo ruhusha ,  ku w'Imana igenekerezo ry'11 Kigarama uyu mwaka  yarashikirije ubuyobozi bw'ibohero imfashanyo zitari nke  kuri iyo mirwi y'abantu twadondaguye. Abantu 11 bararihiwe imiti, abakenyzi 91 bararonkejwe cotex , abana batari bake bararonswa uduhuzu . Haratanzwe kandi ibitambara bikoreshwa mu gushariza ikibanza basengeramwo ngaho mw'ibohero nkuko bivuga n'umwe mu ba pastori barongoye abakristo 580 mw'isengero rya ECM . 

Mapendo avuga ko inyuma yo gushikiriza imfashanyo yaciye akora igikorwa nyamukuru naco ngo kwari ukuvuga ubutumwa. Ico gikorwa yagikoranye n'umuvugabutumwa  Ursule Mulasi wo muri Wa namama jeshi kubwa asengera muri Elohim Church hamwe n'umuririmvyi Mukengurutse Protais batazira Turakingiye aririmba indirimbo za Gospel mw'ishengero rya Pentekote.  Umurwi w'abanyororo 80 babafashije kuririmba yaciye abamerera umwamboro bazohora baserukamwo mu minsi y'amasengesho. Mu gihe abo baririrmvyi borekurwa bazosiga ayo makanzu  ngaho mw'ibohero kugira azokoreshwe n'abandi muri bene ico gikorwa. 

Bukeye Mapendo abicishije ku nsamirizi Voix d'espoir yarateye akamo abarundi bose ko abantu bari mu mabohero naho bakoze amakosa atari abo guheba kuko ngo hariho n'abandi badapfunzwe mugabo bakora amakosa aruta ayakorwa n'abari mu mabohero. Inyuma yako kamo, Mapendo yemeza ko abantu benshi bariko baritanga. Bamwe batanga ifungurwa abandi bibiriya. Mapendo akaba abishima cane. Asaba abarundi kwitaho abanyororo kuko na bonye baguma ari ibiremwa muntu.

Ngo  inyuma yo gukora ibikorane  vyo kubohoka, abantu benshi bavyitabiriye barabohotse cane cane ibijanye no kwisambanya  no gusambana n'ibidayimoni mw'ijoro. Mapendo akaba ashima cane ico gikorwa Imana yakoze ariko akababawza cane n'ubuzima abanyororo babayemwo. 

Aha twokwibukanaya ko umuvugabutumwa Mapendo Anne Marie yaciye aja mu gihugu ca Tanzaniya kuvuga ubutumwa akaba yaramaze kugaruka ngaha mu Burundi yitegurira kuja mu gihugu ca Malawi muri ico gikorwa co kuvuga ubutumwa.